ទូលព្រះបង្គំជាខ្ញុំ ទេស វិបុល ប្រធាន សមាគមសេរីភាពអ្នកសារព័ត៌មានកម្ពុជា និង សមាជិក សមាជិកា សូមព្រះបរមរាជានុញ្ញាតលំឱនកាយក្រាបថ្វាយបង្គំ ថ្វាយព្រះពរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរព សក្ការៈដ៏ខ្ពង់ខ្ពស់បំផុត ក្នុងព្រះរាជវរោកាសដ៏មហាមង្គល និងមហានក្ខត្តឫក្សនៃ ខួបលើកទី២០ (២៩តុលា២០០៤-២៩តុលា ២០២៤) នៃការយាងគ្រងព្រះបរមសិរីរាជសម្បត្តិ របស់ព្រះករុណា។
ទូលព្រះបង្គំទាំងអស់គ្នា សូមលើកហត្ថប្រណម្យ បួងសួងដល់ គុណបុណ្យព្រះរតនត្រ័យ អស់ទេវតានិងវត្ថុស័ក្តិសិទ្ធិក្នុងលោក ព្រមទាំងព្រះបារមីព្រះមហាស្វេតច្ឆត្រ ជាពិសេស ព្រះវិញាណក្ខន្ធ ព្រះបរមរដ្ឋតនកោដ្ឋ សូមយាងប្រោសព្រះរាជទានពរជ័យ សិរីមង្គល វិបុលសុខមហាប្រសើរ ថ្វាយ ព្រះករុណាព្រះមហាក្សត្រ ជាអម្ចាស់ជីវិតលើត្បូងជាទីគោរពសក្ការ:ដ៏ខ្ពង់ខ្ពស់បំផុត សូមព្រះប្រកបដោយ ព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណវាងវៃ ព្រះជន្មាយុយឺនយូរជាងរយព្រះវស្សា ដើម្បីបន្តគង់ប្រថាប់ក្នុងព្រះបរមរាជសម្បត្តិ ជាម្លប់ដ៏ត្រជាក់ត្រជំ សុខដុមរមនា របស់ប្រជានុរាស្ត្រខ្មែរទាំងអស់៕
